Starship сынақ кезінде жарылды: зымыран бақылаудан шықты
SpaceX компаниясы жасап жатқан өте ауыр салмақты Starship зымыранының кезекті сынақтық ұшырылымы сәтсіз аяқталды. CNBC ақпараты бойынша, оқиға оныншы сынақ ұшыруына дайындық кезінде орын алды: бірінші саты ажырасқан соң жарылып, екінші сатыда отын ағып кеткен.
АҚШ бұқаралық ақпарат құралдары хабарлағандай, екінші саты ұшуды жалғастырғанымен, көп ұзамай басқарудан шығып кетті. Атмосфераның тығыз қабаттарына кірген сәтте зымыран бұзыла бастап, соңында жарылып кетті.
SpaceX инженерлері зымыранның жоғалғанын растады және бұл оқиға басқару жүйелері мен инженерлік шешімдерді жетілдіруге көмектеседі деп мәлімдеді. Қазіргі таңда компания жарылыс пен отынның ағып кету себептеріне қатысты ішкі тергеу жүргізіп жатыр.
Апатқа қарамастан, SpaceX басшылығы жиі сынақтар жүргізу — қайта пайдаланылатын зымыранды жасау барысын жеделдетудің негізгі жолы екенін атап өтуде. Starship — Ай мен Марсқа ұшуға арналған инфрақұрылымды құру бойынша компания жоспарының негізгі бөлігі.
Айта кетейік, Starship — адамзат тарихындағы ең қуатты зымыран ретінде жасалып жатыр. Ол орбитаға 150 тоннаға дейін пайдалы жүк жеткізе алады және бірнеше рет қолдануға арналған. Жоба NASA-ның Artemis бағдарламасы аясында жүзеге асырылады.
Редакция басқа көздерден алынған, жіберілген немесе алынған материалдардың мазмұны мен дұрыстығына жауапты емес. Мұндай материалдарды жариялау тек ақпараттық мақсаттарға арналған және олардың мазмұнын автоматты түрде растауды немесе мақұлдауды білдірмейді.