Трамптың тариф саясаты ғасырдағы ең ірі сауда дағдарысына әкелуі мүмкін
АҚШ президенті Дональд Трамп соңғы ғасырдағы ең көлемді сауда шектеулерін жарияламақ. Бұл туралы ресми мәлімдеме алдағы күндері Ақ үйде жасалады деп күтілуде, алайда болашақ тарифтердің нақты параметрлері әзірге белгісіз. Bloomberg дерегінше, шамамен $33 трлн көлеміндегі жаһандық сауда ағыны қауіп астында тұр, ал кейбір елдердің АҚШ-қа экспорты 4%-дан 90%-ға дейін қысқаруы мүмкін.
Bloomberg Economics мәліметі бойынша, жаһандық сауда белгісіздігі индексі 2009 жылдан бергі ең жоғары деңгейге жетті. Nomura бас экономисі Роб Саббараман әлем нақты ережесіз және кең ауқымды қамтитын жаңа тарифтік соғысқа «көз жұмып» бет алып бара жатқанын ескертті.
Goldman Sachs сарапшылары АҚШ-тың орташа тарифтік мөлшерлемесі биыл 15 пайыздық тармаққа көтерілуі мүмкін деп болжайды. Бұл инфляцияны үдетіп, ЖІӨ өсімін баяулатып, рецессия қаупін арттырады. Ең қатаң сценарий жүзеге асса, тарифтер 28 пайыздық тармаққа дейін өсіп, АҚШ ЖІӨ-сі 4%-ға төмендеп, алдағы 2–3 жылда тұтыну бағалары 2,5%-ға жуық қымбаттайды.
Колумбия бизнес мектебінің профессоры Шан-Цзинь Вэй қазіргі жағдайды 1970-жылдардағы энергетикалық дағдарыспен салыстырып, сауда шектеулері стагфляцияның — экономикалық тоқырау мен инфляцияның — жаңа триггеріне айналуы мүмкін екенін атап өтті.
Bloomberg деректеріне сәйкес, жаңа тарифтік саясат нысанына Еуропалық одақ, Мексика, Канада, Жапония, Оңтүстік Корея, Вьетнам және Үндістан ілігуі мүмкін. Қытайдан келетін импортқа қазірдің өзінде 20% көлемінде қосымша баж салығы салынған.
Трамптың тарифтік қадамдары жаһандық тәуекелдерді күшейтіп, XXI ғасырдағы ең ірі экономикалық күйзелістердің біріне әкелуі ықтимал.
Редакция басқа көздерден алынған, жіберілген немесе алынған материалдардың мазмұны мен дұрыстығына жауапты емес. Мұндай материалдарды жариялау тек ақпараттық мақсаттарға арналған және олардың мазмұнын автоматты түрде растауды немесе мақұлдауды білдірмейді.