39,5 МЛРД ТЕҢГЕ ЖӘНЕ 300 ЖҰМЫС ОРНЫ ШЫМКЕНТТЕ

Шымкентте Polpharma Santo фармацевтикалық өндірісін ауқымды кеңейту басталады. Жобаның көлемі 39,5 млрд теңге жеке инвестицияны құрайды. Жоба Денсаулық сақтау министрлігі және «Химфарм» АҚ-мен бірлесіп жүзеге асырылады және ішкі нарықта отандық дәрілік заттардың үлесін арттыруға бағытталған.

Жобаны іске асыру туралы келісімге Премьер-министр Олжас Бектенов қол қойды. Кеңейту аясында шамамен 300 жаңа жұмыс орны ашылады деп жоспарланып отыр. Инвестиция қаражаты жаңа өндірістік нысандар салуға, заманауи жабдықтармен қамтамасыз етуге және ғылыми-зерттеу бағдарламаларын дамытуға бағытталады.

Кәсіпорынның бірінші кезегін 2029 жылдың соңына дейін іске қосу көзделген. Жаңа қуаттар іске қосылғаннан кейін 38 атаудағы дәрілік препараттарды шығару мүмкіндігі пайда болады. Олардың қатарында онкологиялық, жүрек-қантамыр, инфекциялық және созылмалы ауруларды, оның ішінде туберкулезді емдеуге арналған дәрілер бар. Өндіріс халықаралық сапа стандарттарына сәйкес жүргізіледі.

Жобаны іске асыру Қазақстанның дәрілік қауіпсіздігін нығайтып, фармацевтика саласының технологиялық базасын кеңейтуге және экспорттық әлеуетін арттыруға мүмкіндік береді. Сондай-ақ кейбір дәрі түрлері бойынша импортқа тәуелділікті азайтуға жағдай жасалады.

Редакция басқа көздерден алынған, жіберілген немесе алынған материалдардың мазмұны мен дұрыстығына жауапты емес. Мұндай материалдарды жариялау тек ақпараттық мақсаттарға арналған және олардың мазмұнын автоматты түрде растауды немесе мақұлдауды білдірмейді.