ШЫМКЕНТТЕ ҚҰЖАТТАРДЫ ХҚКО-ДАН ТӘУЛІК БОЙЫ АЛУ

Шымкентте ХҚКО-дан дайын құжаттарды автоматтандырылған постамат арқылы алу мүмкіндігі енгізілді. Қызмет тәулік бойы, демалыс және мереке күндерін қоса алғанда жұмыс істейді. Бұл туралы «Азаматтарға арналған үкімет» Мемлекеттік корпорациясы хабарлады.

Постамат азаматқа дайын құжатты жеке ұяшықтан өз бетінше алуға мүмкіндік береді. Құжат дайын болғаннан кейін өтініш берушінің телефон нөміріне ұяшықты ашуға арналған жеке коды бар SMS-хабарлама жіберіледі. Сонымен қатар биометриялық сәйкестендіру рәсімі жүргізіледі.

Қазіргі уақытта қалада бір постамат жұмыс істейді. Ол Жангелдин көшесі, 13А мекенжайында орналасқан. Автоматтандырылған пункт арқылы мемлекеттік қызметтердің 19 түрі бойынша дайын құжаттарды алуға болады. Олардың қатарында туу туралы, некеге тұру, некені бұзу және қайтыс болу туралы қайталама куәліктер, архивтік анықтамалар, сондай-ақ аттестаттар мен дипломдардың телнұсқалары бар.

Қызметті пайдалану үшін ХҚКО-да өтініш беру кезінде дайын құжатты алу тәсілі ретінде постаматты таңдап, келісім беру қажет. SMS-хабарлама алғаннан кейін құжатты үш күн ішінде алып кету керек. Егер белгіленген мерзімде алынбаса, құжат ХҚКО маманы арқылы әдеттегі тәртіппен беріледі.

2026 жылы постамат арқылы құжат беру қызметінің құны 518 теңгені құрайды. Мемлекеттік корпорация мәліметінше, бұл сервис мемлекеттік қызметтерді алу тәсілдерін кеңейтіп, азаматтарға құжаттарды ыңғайлы уақытта алуға мүмкіндік береді.

Редакция басқа көздерден алынған, жіберілген немесе алынған материалдардың мазмұны мен дұрыстығына жауапты емес. Мұндай материалдарды жариялау тек ақпараттық мақсаттарға арналған және олардың мазмұнын автоматты түрде растауды немесе мақұлдауды білдірмейді.